மே 16, 2022

ஐந்நூறு கிராமங்களைத் தின்னும் ஆடு

 -துவாரகன்


இருவர் சேர்க்கையால் 

கலந்த நாற்றம்

ஐவரைச் சுற்றிக்கொண்டிருந்தது.

இப்போது ஐந்நூறு ஊர்களில் வீசிக்கொண்டிருக்கிறது


எப்படியாயினும் 

அந்த நாற்றத்தைத் தீர்க்கும்

வழியெதுவும் 

அவனுக்குப் புலப்படவில்லை.


ஒருவேளை

இரண்டு கிராமங்களைத் தின்ற

அந்த வெள்ளாடு வாய்த்தால்

ஐந்நூறு கிராமங்களில் உலாவும்

நாற்றத்தைத் தின்று தீர்த்துவிடலாம்.


ஒரேயொரு பத்திரம்தான்.

எழுதித்

தலைமாட்டில் வைத்துப் படுத்திருக்கிறான்.

ஒரு வெள்ளாடு

அந்த நாற்றத்தைத் தீர்த்துவிடும்

என்ற நம்பிக்கையோடு.

15052022

மே 13, 2022

காறை பெயரும் சுவர்கள்


-துவாரகன்
உங்களைச் சுற்றி
பெரிய சுவர்களை எழுப்பியுள்ளீர்கள்.
தவறுதலாகக்கூட
எங்கள் மூச்சுக்காற்று
பட்டுவிடக்கூடாதென
இடையில் கண்ணாடிகளையும் பொருத்தியுள்ளீர்கள்.
உங்கள் சுட்டுவிரல்களுக்கும்
உங்கள் குரல்களுக்கும்
உங்கள் பொதிகளுக்கும்
ஓர் எருமைக்கூட்டம்
உள்ளதென நினைத்தீர்கள்போலும்.
நன்றாகக் கவனியுங்கள்
நீங்கள் கட்டிய சுவர்களின்
காறைகள் பெயரத் தொடங்கியுள்ளன.
உப்புக் காற்றில் கற்கள்
போறையாகிக் கொண்டிருக்கின்றன.
அத்திவாரக் கற்களின் கீழே
நீரோடிய பாதைகள் துலக்கமாயுள்ளன.
இன்னமும்
இந்தச் சுவர்கள்
பலமென்று நம்புகிறீர்களா?
கருமேகக்கூட்டம்
எப்போதும் வானத்திற்குச் சொந்தமில்லையென்று
ஒரு தவிட்டுக் குருவிக்குக்கூட
நன்றாகத் தெரியும்.
நீங்களும்
நம்பித்தான் ஆகவேண்டும்!
10042022

ஏப்ரல் 07, 2022

உனது கடலில் வேறொருவன் நீச்சலடிக்கிறான்



-துவாரகன்


உனது கடலை
பிரியமுடன் அவளுக்குப்
பரிசளித்தாய்
புனிதம் என்றார்
புன்முறுவல் சேர்த்தார்

கடலை விட்டு
பெருவீதியில் நடக்க ஆசைப்பட்டாய்
வாகன நெரிசலிடை முக்குப்பட்டாய்
வானத்தால்
பறந்தாவது செல்வேன் என்றாய்

குறுக்குவழியே
முன்னோர் அனுபவம்

முருங்கைக்காய் கட்டும்
கறுத்தக்கொழும்பானும்
பழைய விதிகள் என்றாய்.

முனியப்பருக்குப் பதில்
முனியப்பரே முன்வந்தார்.

மரபை மாற்றினாய்
சான்றுகளைக் குப்பையில் வீசினாய்
கபடமும் அசூசையும் நிறைந்த
கள்ளப்பாதையொன்று திறந்தது

நீயோ,
பாவங்களின் மீதேறிநின்று
மமதையுடன்
பல்லிளித்துக் கொண்டிருக்கிறாய்.

அவரவர் கடலில்
அவரவர் நீச்சலடிக்க,
உனது கடலில் மட்டும்
வேறொருவன்
நீச்சலடித்துக் கொண்டிருக்கிறான்.
02042022

சேற்றில் விழுந்தவன் நறுமணம் பூசுகிறான்

 


-துவாரகன்

பெரிய மீன்கள்
விழுங்கிவிடக்கூடும் என்று
சின்னமீன்கள்
கரையொதுங்கி
மண்ணில் விழுந்து
எப்போதாவது
தற்கொலை செய்ததுண்டா?

நீரலையில் எதிர்த்தோடுகின்றன
நீச்சலடித்துத்
துள்ளிவிழுகின்றன
வாழ்ந்துவிடும் ஆசையோடு 
போராடுகின்றன.

உன்னைப்போல்
சேற்றில் விழுந்து
சோரம்போனவனல்ல.

வாழும் ஆசை
சின்ன மீன்குஞ்சின் துடிப்புடன்
இன்னமும் மீதமாயுள்ளது.
29032022

கரைந்து நீளுதல்


-துவாரகன்

சோம்பல் முறித்து எழுந்த சூரியன்
மரங்களிடையே ஒளித்து விளையாடுகிறான்.
யாரோ சிந்திவிட்ட சோற்றுப் பருக்கைகளை
எறும்புகள் இழுத்துச் செல்கின்றன.
வைக்கோற்போர் அருகே
சிதறிய நெல்மணிகளை
அணிற்பிள்ளைகள் தேடித் தின்கின்றன.
வெறும் குப்பையைக் கிளறி
கோழிகளை மேய்த்துக் கொண்டிருக்கிறது
கொண்டை வைத்த சேவல்.

நேற்றைய பூக்களை
உதிர்த்துவிட்டிருக்கிறான் காலதேவன்.
மேசையில் விரித்து வைத்த
புத்தகத்தின் பக்கங்கள்
நகர மறுக்கின்றன.

எந்தச் சலனமுமற்று
விடிகின்றது
மற்றுமொரு காலைப்பொழுது...

அந்தச் சோம்பலைத்
துடைத்தெறிகிறது
உன்னுடைய மொட்டுச் சிரிப்பு.
18022022
நன்றி : உயிரோடை வானொலி

காலத்தின் ரேகை


- துவாரகன்

சோர்வையே அள்ளிக் தெளிக்கும் மம்மல். மனிதர்களின் குரலில்லாத இடைவெளியை வானொலி நிரப்புகிறது. காலில் உரசிக்கொண்டிருந்த பூனையும் வாலைச் சுருட்டிக்கொண்டிருந்த கறுப்பனும் உலாப் போய் விட்டன. புலுனிகள் மட்டும் நாற்சார் முற்றத்தில் குதூகலமாய். உணர்வைத் தொலைத்துவிட்டு மின்மினிகளின் பின்னால் மனிதர்களும் சென்றுவிட்டார்கள். இருளும் ஒளியும் ஒன்றாகிய வாழ்வில் கண்சிமிட்டும் வெளிச்சம் அவளைத் தேற்றப்போவதில்லை. பேர் சொல்லி அழைக்கும் ஒரு குரலுக்காக... அந்தக் கணங்கள் கழிந்து கொண்டிருக்கின்றன. அழுக்கேறிப்போன மேசையில் வலது கையூன்றி இருட்டை வெறித்தபடி இருக்கிறாள். ஒரு காலடியோசை. அவசரத்தில் மூக்குக் கண்ணாடியை எடுத்துப் பொருத்துகிறாள். கைத்தடியைத் தேடி எடுக்கிறாள். தனிமை... அவள் காலடியில் சுருண்டு கிடக்க, காலம், தன் ரேகைகளை அள்ளித் தெளித்துவிட்டுச் சென்று கொண்டேயிருக்கிறது.
02/2022

பிப்ரவரி 24, 2022

ஆத்மவிசாரியின் பாவச்சுமை

 


- துவாரகன்

 

உன் முதுகை அழுத்தும் அத்தனையும்

பாவமூட்டைகளா?


முற்றிய நெற்கதிர்

தலைசாய்த்தபோதெல்லாம்

காட்டாறாய் வந்தாயே!

கையறுநிலைக் கண்ணீர்ப்படலத்தைப்

பரிசளித்தாயே!

அந்தப் பாவத்தைக் கழுவுதற்கா

திசையெட்டும் நீர்ப்படியேறினாய்?

 

மழை பெய்து ஓய்ந்துபோன

விடிகாலை வேளையிலே,

காக்கைகூடக் கரையாமல்

தனியனாய்

அங்கப் பிரதிஷ்டை செய்தாயே!

உன் பாவங்கள் கரைந்தனவா அன்பரே?

 

விச ஈட்டி  பாயும்முன்னே

உன் அரற்றல் கேட்டு

உள்ளே அழைக்கக்கூடும்

என்று நினைந்தழுகிறாய்.

 

உன் முதுகை அழுத்திக் கொண்டிருப்பது

திட்டிவாயிற் காவலனுக்குரிய

பரிசுப் பொதியல்ல

பாவச்சுமை!

26012022

ஜனவரி 24, 2022

விழி பிதுங்கும் மாடுகள்

 - துவாரகன் 


அந்த நாற்றத்தை

நாங்கள்

மூன்று தலைமுறையாக

அனுபவிக்கிறோம்

என்றார் பெரியவர்.

 

நல்ல மாட்டுக்கு

ஒரு சூடு போதும்.

இந்த மாடுகளை

என்னதான் செய்வது?

 

கால்களைப் பிணைத்து

லாடம் அடித்து

நாணயக் கயிற்றை

இறுக்கிக் கட்டி

எரு ஏற்றிப்

பாரம் இழுக்க வைத்தால்

எல்லாம் சரிவரும்.

 

இல்லாவிடில்

குறி சுருங்கும்வரை

சூடுவைக்க வேண்டியதுதான்!

21012022

வெட்டுக்கிளிகளின் நூற்றியெட்டுக் கதைகள்

 - துவாரகன்


இன்று நீ என்ன செய்து கொண்டிருப்பாய்?

பிரமிப்பில் வாழ்த்துக்களைப் பரிமாறிக் கொண்டிருப்பாய்.

இனிப்புப் பலகாரங்களையும்

சில புதிய ஆடைகளையும்

வாங்கி வைத்திருப்பாய்.

பவுடர் அப்பிய முகத்துடன்

புன்னகை பூத்தபடி,

படியேறும்போது

எந்த வார்த்தையை

முதலில் பேசவேண்டுமென்று

மனப்பாடம் செய்து கொண்டிருப்பாய்.

ஆனால்,

உன்னைப் பார்த்து

நான் பரிதாபப்படுகிறேன்.

உனக்காக.

ஐந்து பகல்களும்

இரண்டு இரவுகளும்

அன்னியனின் ஆயிரத்தெட்டு வண்ணங்களையும்

புலுனிகளின் கீச்சிடலுக்கும்

நாய்களின் குரைப்புகளுக்குமிடையே

நெருப்பில் சுட்ட

கருவாட்டு வாசனை நினைப்பில்

இதயம் கருக

ஏற்றுக்கொண்டாளே!

அது

நீ தேடிக்கொடுத்த

சுயநல இருள்.

உயர்ந்த நீர்த்தாங்கியில்

தொங்கிக் கொண்டிருக்கும் குளவிக்கூடுபோல்,

எல்லோர் கண்களிலும் துலங்குகிறது

வெட்டுக்கிளிகளின் நூற்றியெட்டுக் கதைகள்.

நீ தேடிக் கொடுத்த பரிசுகள் அவை.

அவளின் கட்டை தீயில் வேகும்வரை

ஆறாதது!

14012022

http://www.easy24news.com

அகலிகையின் செருப்பு

- துவாரகன்



மற்றவர் பொருளைத் திருட 

என் தந்தை 

எனக்குக் கற்றுத் தரவில்லை. 

நானும் என் மகனுக்குக் 

கற்றுக் கொடுக்கப் போவதில்லை. 


நிரம்பக் கற்றவர்களும் 

மற்றவர் பொருளைத் 

திருடக் கற்றிருக்கிறார்கள். 

செருப்பைக்கூட...

களவாக அணிந்து பார்க்க 

ஆசைப்படுகிறார்கள். 


இந்திரன் சேவலாகியதும் 

திருட்டுக்காகத்தான். 

பூனையாகிப் பொட்டுக்குள்ளால் 

தப்பியோடியதும் 

திருடியதால்த்தான். 


ஏன், அகலிகைக்கு மட்டும் 

தான் அணிந்திருந்தது 

தன் செருப்பில்லையென்று 

தெரியாமலா போனது? 


திருடியவரும் 

திருடக் கொடுத்தவரும் 

பிரதியுபகாரமாக 

ஒன்றை இன்னொன்றால் 

நிரப்பிக் கொள்கிறார்கள்போலும்!

12012022

https://vanakkamlondon.com/literature/kavithaikal/2022/01/147143/?fbclid=IwAR0FF6xmZvNt6IKx9WG01J7j2dfVtejxq_plCxWbz96egGQWVIghYsikb_M

ஜனவரி 06, 2022

புதிய மூன்று சிலுவைகள்

 

-துவாரகன்

 

பொய்யருக்கும்

காமுகருக்கும்

சட்டவிரோதிகளுக்கும்

இந்த அழகிய வெளி

திறக்கப்பட்டிருக்கிறது.

 

மூலையில் பதுங்கியிருக்கும்

உண்மையை

சவுக்கால் அடியுங்கள்.

ஒழுக்கத்திற்கு

முட்கிரீடம் சூட்டுங்கள்.

நேர்மைக்கு

நஞ்சுகொடுத்துச் சாவடியுங்கள்.

 

மீளவும் உயிர்க்காதபடி

மூன்று சிலுவைகளிலும்

முந்நூறு ஆணிகொண்டு

அறையுங்கள்.

 

நாங்கள் எல்லோரும்

பொய்யரைப் போற்றுவோம்.

நாங்கள் எல்லோரும்

காமுகரைக் கொண்டாடுவோம்.

நாங்கள் எல்லோரும்

சட்டவிரோதிகளுக்குப்

பன்னீர் தெளிப்போம்.

04012022

https://vanakkamlondon.com